港聞

港聞二

【Emily】不滿官員「社會事件」形容反修例 何君堯轟鄭若驊唔用「黑暴」

【明報專訊】建制派形容前年嘅反修例風波係「黑暴」,官員就會用「社會事件」等字眼,但就引起立法會議員何君堯不滿,仲三度狙擊律政司長鄭若驊。立法會噚日舉行特別財委會,對於官員用「社會事件」字眼回覆提問,何君堯話:「我好反感,點解現時仲叫社會事件?」佢強調前年風波係「黑暴」,「你哋仲咁斯文?有冇搞錯?唔該糾正自己思想好冇?」佢仲話,以後聽到官員再講「社會事件」嘅話,「唔該出門口」。

鄭若驊無正面回應有關質疑,司法機構政務長梁悅賢回應時繼續用「社會事件」字眼。何君堯就進一步質疑,「如果我話新冠病毒係武漢肺炎,你會唔會接受?」,要求鄭若驊斬釘截鐵話畀19萬公務員聽,唔好再叫「社會事件」,「好哽耳」。

鄭:點叫佢,對法律工作冇變

鄭若驊就話,前年不同案件都可見有街頭暴力、暴動等,「你點叫佢,對我哋法律工作冇變」,又話2019年有合法、和平示威都唔奇,最重要係維護法治,按法律去做。翻查資料,教育局長楊潤雄上月底以「社會動亂」形容反修例;保安局近日發表2019年撲滅罪行委員會報告書,就用「黑暴」。

喺政制及內地事務一節,民建聯何俊賢問到種族歧視應否涵蓋更多範圍,以去年疫情初爆發、有店舖不招待內地人為例,形容係「人渣、不人道」行為,影響港人國際形象、「我都感覺我受到歧視」,問局長曾國衞如果日後有人宣誓時「辱華」,會否觸犯種族歧視條例。曾國衞話,正積極研究如何確保內地同胞來港不受不平等對待,修例係研究方向。

相關字詞﹕種族歧視 立法會議員 民建聯 反修例風波 武漢肺炎

上 / 下一篇新聞