港聞

港聞二

【Emily】湯家驊:外國遇上港人被錯叫梁家傑

【明報專訊】行會成員、資深大律師湯家驊(Ronny)噚日喺facebook自爆,10幾年前曾畀人認錯做公民黨主席梁家傑。話說當年Ronny同太太搭飛機去日本賞櫻花,等緊落機之際,有人行埋嚟介紹自己,話係移居日本嘅香港人,想同Ronny做個朋友,但就認錯佢做梁家傑,搞到Ronny都唔好意思,解釋話「對唔住,我係湯家驊,唔係梁家傑!」

場面尷尬,但不打不相識,嗰位朋友話知道Ronny係邊個,亦支持佢嘅政治立場,當時只係叫錯人名,最後請Ronny同佢太太食晚飯賠罪,雙方成為朋友。不過,呢種烏龍事唔止發生一次,Ronny話有時喺外國遇上港人,佢哋未必記得佢叫咩名,甚至曾經被叫錯做已故民主黨前黨鞭司徒華,「但他們知道我是誰、代表什麼,他們支持溫和政治之心是毋庸置疑的」。

相關字詞﹕梁家傑 湯家驊

上 / 下一篇新聞