港聞

港聞二

【Emily】反駁民主派 葉劉:你讀民主書多定我多?

【明報專訊】人大修改《基本法》附件一、二後,選委會界別佔立法會40席,外界關注建制派議員會否轉跑道、改循選委會界別參選。新民黨主席葉劉淑儀接受NowTV專訪時話,已享受過民意授權滿足感,「入到議會,冇人記得你幾多票,正如你幾多年前考第一係冇人理,你大個出去做嘢,冇人理你考第幾,最緊要係做嘢之後嘅表現」。至於會唔會轉跑道去選委會界別,佢就話等新民黨決定,但唔認為直選「含金量」較高。

稱直選含金量非較高

對於民主派質疑新選舉制度收窄佢哋參選空間,葉太反問「佢哋就民主派,我哋就唔民主?」佢話大家同樣都參選,「你讀民主書多定我多?相信我一定多過好多人,點可以話冇佢哋就冇民主派?」翻查資料,美國知名民主政治學者戴雅門曾經係葉太碩士論文導師。葉太強調,一啲都唔擔心民主派日後絕迹議會,佢話如果要講反對政府、監察政府,「睇吓謝偉俊鬧政府幾甘?可能(日後)變本加厲,證明自己唔係橡皮圖章嘛」。

被問到日後如參選特首,選委會5界別要各取15個提名,葉太認為合理,「絕對唔能夠只靠工商界支持,就唔理社工界」,至於會否參選,佢話言之尚早,現時唔得閒考慮。

相關字詞﹕選委會 選舉制度 新民黨 葉劉淑儀

上 / 下一篇新聞