港聞

港聞二

【Emily】鐵路博物館百年車卡 驚現分體式冷氣機

【明報專訊】有100年歷史嘅九鐵313號蒸汽火車車卡,去年經政府修復後運送至鐵路博物館,博物館早前回復正常開放,但有市民參觀313號車卡後發現,車廂加裝咗分體式冷氣機、電視櫃等現代裝備,令百年車卡成為「冷氣放映廳」,批評康文署無考慮文物價值,破壞車卡原貌,盼車卡盡快回復原狀。

風扇變喇叭 拆櫈裝電視

fb專頁「大埔交通」噚日發帖,話近日參觀313號車卡後,發現車廂內加裝咗分體式冷氣機,車窗亦加裝掛簾,天花板原先安裝風扇嘅位置就安裝咗喇叭,前頭位置更拆走幾行櫈用嚟加裝電視櫃,令一架百年歷史火車卡變成「冷氣充足嘅放映廳」,到場參觀嘅家長更要同仔女講解「以前嘅火車係唔應該有冷氣」。

「大埔交通」發言人同Emily講,對館方改動車卡非常失望,既踐踏文物價值,亦唔尊重復修團隊心血,而且影響市民正確理解313號車卡歷史。佢話即使館方要將車卡作放映用途,亦應以唔影響文物真實性為大前提,可考慮舉辦放映活動時,先將吹風機同輕便影音器材搬入車卡,平時就無需要呢類設備。佢認為事件反映館方對保育鐵路文物嘅敏感度不足。

康署:提供舒適環境辦活動

康文署回覆稱,修復313號車卡後,會用作舉辦有關火車嘅活動同講座,需加裝電力同燈光設備,並引入多媒體同音響設備。署方話,為咗提供舒適嘅參觀環境,喺唔影響車卡完整同結構下,喺新修復嘅位置同物料上安裝冷氣,而被移走嘅座椅已安放喺館內其他位置以供使用;又話館內302號車卡內裏陳設同313號車卡類同,保持原貌,歡迎參觀。

相關字詞﹕鐵路博物館 313號蒸汽火車

上 / 下一篇新聞