港聞

港聞二

【Emily】新民黨孖媽帶子女送暖酒吧雀館 囡囡送畫有黃色 Eunice:咩色都要識

【明報專訊】酒吧、卡拉OK同麻將館仍復業無期,業界噚日組織「邊學,邊行,邊走」活動,主題係「抗疫疲勞,以畫送暖」,搵咗新民黨容海恩(Eunice)、陳家珮帶埋仔囡畫畫向業界送暖,但就畀網民質疑兩個媽媽點解要帶子女去支持酒吧同麻將館。Eunice向Emily解釋,活動係希望畀到關懷呢班業界人士及其家人,今次有不同小朋友參與,「正正想用小朋友嘅畫(送暖),佢哋冇任何政治考慮」,只想將關懷送畀有需要嘅家庭。

Eunice提到,酒吧、卡拉OK要停業,其實員工成個家庭都需要關顧,希望活動可以關懷佢哋,希望起碼有復業時間表。

容海恩曾經喺訪問講過,話囡囡「千祈唔好識黃色就得喇」。有眼利網民就發現,Eunice囡囡噚日畫畫有黃色,Eunice笑言都係百花齊放,「最緊要咩色都要識,都係均衡發展」,又話之前講法都係希望強調唔能夠將任何嘢訴諸暴力。

業界:又不是八十年代 酒吧唱K非形象負面

香港持牌酒吧會所聯會創會會長梁立仁就話,小朋友都可去唱K,𠵱家都唔係1970、80年代思維,一提酒吧、唱K就形象負面,仲話好多家長會帶小朋友唱K。梁話「希望政府似湊小朋友咁,以邊學、邊行、邊走態度,帶我哋業界走出困境」,話邀請小朋友都係想溫情鼓勵業界員工,盼大家唔好灰心。新聞稿又形容,政府喺抗疫期間「猶如我們的父母」,帶港人喺抗疫路上經歷波折,但幾個業界仍強制停業,「政府是否已遺棄及遺忘了這幾個兒女」。

相關字詞﹕梁立仁 第四波 麻雀館 容海恩 酒吧 新民黨

上 / 下一篇新聞