港聞

港聞二

【Emily】港府向英國家檔案館購檔案

【明報專訊】近年有關一國兩制、《基本法》同《中英聯合聲明》等爭議,好多人都會翻閱歷史檔案文件。行政署回應特別財委會嘅書面問題,透露上年度政府檔案處由英國國家檔案館同埋美國布殊總統圖書館及博物館,購入559項有關香港嘅歷史檔案,涵蓋多個同香港歷史相關嘅主題,包括香港前途問題、政治與領袖人物、中英主要官員訪問、中英聯合聲明、基本法等。

涉回歸前途問題等主題

政府回應體育、演藝、文化及出版界議員馬逢國嘅書面問題,話購入上述559項有關香港嘅歷史檔案,涉及開支約60萬元,當中絕大部分、有549項檔案嚟自英國國家檔案館。除咗上述主題,仲包括香港經濟及金融發展、國籍與公民身分、越南船民、政治環境及國際關係、港口及機場發展等。檔案處現正做品質檢定、整理同描述工作,預計今年第二季起陸續開放有關檔案畀市民查閱。

檔案處亦同中國第二歷史檔案館確定咗一份同香港有關嘅檔案目錄清單,雙方正商討同草擬有關購買檔案複本嘅條款。檔案處正致力將藏品數碼化,將複本開放畀市民查閱。

上 / 下一篇新聞