港聞

港聞二

【Emily】8個月近200公僕染疫 警隊27人最多

【明報專訊】立法會財委會下周開特別會議,審核政府2021/22財政年度開支預算,議員早前提交各式書面提問,政府部門近日開始回覆,其中工聯會郭偉强要求提供政府僱員確診新冠病毒數字、政府有乜措施及支援減低僱員感染風險。公務員事務局回覆話,上年7月中起要求各局或部門呈報員工確診數字,截至今年3月15日錄得197宗,當中最多人感染嘅部門係警務處,有27宗。

消防處23人確診排第二

第二多人染疫嘅部門係消防處(23宗),之後係有19人確診嘅康文署、14人確診嘅食環署;房屋署、衛生署、司法機構等多個部門亦有員工確診。

各部門安排新一輪特定群組檢測

局方話非常關注僱員職安健,包括喺實施特別上班安排期間,各局、部門有按其運作模式同所需提供嘅必要服務調配人手 ;除提供緊急和必須公共服務及參與抗疫嘅人員外,其他政府僱員會按實際運作需要盡量留家工作,以減少社區嘅人流同社交接觸、有效阻止新冠病毒喺社區傳播。為保障同事同家人健康同安全,各部門首長已獲指示為前線、從事高風險工作嘅同事安排新一輪特定群組檢測。

上 / 下一篇新聞