港聞

港聞二

【Emily】中學辦長者電競賽 學生教備戰

【明報專訊】電競對賽一開始,66歲嘅彭翼寰不發一言緊盯熒幕,左手控制平板電腦熒幕嘅搖桿,右手連番發動攻勢,對戰時佢緊張到雙臂肌肉繃緊,可惜最終輸畀年過七十嘅鄭賽珠,鄭賽珠一獲勝就同中學生隊友拍掌叫好。萬鈞匯知中學將舉辦長者電競大賽,該校學生連月教長者打電競備戰,有參賽長者話,活動令佢進入年輕人世界,了解佢哋想法,呼籲社會唔好草率標籤年輕一代「廢青」。

參賽者:同阿仔媳婦多咗溝通

勿標籤年輕人廢青

打機唔係後生仔專利,萬鈞匯知中學、浸大教育學系及基督教靈實協會合作,兩校各派約20個學生,教長者打電競。學生1月底起每星期同長者見面一次,礙於疫情,佢哋只能隔住電腦熒幕,喺視像會議程式教長者操控遊戲嘅「英雄」角色、點樣發動攻擊等。經過幾個月練習,長者聽日就會喺電競賽場一較高下。

彭翼寰話,阿仔同媳婦都玩電子遊戲,自己參賽後,佢哋都對佢玩電競感好奇,彼此多咗共同話題,亦多咗溝通,認為電競幫佢走入年輕人嘅世界。佢又話參加活動後對電競改觀,認為可以成為人生目標之一。社會不時討論「世代矛盾」,老一輩及新一代互指「廢青」、「廢老」。彭翼寰就話現今青年比佢年輕時更難謀生,加上年輕人喺社會面對唔少挫敗,籲大眾體諒佢哋嘅困境,唔應該草率標籤年輕人係「廢青」。

教長者打機嘅萬鈞匯知中學中三生勞皓朗話,活動中無咩特別要同長者磨合嘅事,笑言彼此最大分別只係年齡,「落場同長者打機,好似與自己朋友打機一樣」。

相關字詞﹕浸會大學 靈實 萬鈞匯知中學 長者 電競

上 / 下一篇新聞