港聞

港聞二

【Emily】獨囚張可森讀村上哼廣東歌

【明報專訊】民主派立選初選案36人正在還押,噚日屯門區議員潘智鍵、王德源去到赤柱監獄,探望同為屯門區議員嘅張可森(Sam)。「屯門社區網絡」其後出帖,透露阿Sam雖然仲係單獨囚禁,但好精神,喺獄中睇緊好多書,例如已經睇晒獄中可以借嘅3本村上春樹著作,平時喺單人囚室會哼廣東歌,覺得自己同香港有連結,亦話希望大家多聽廣東歌,「因為『有廣東話就有香港』」。

枱櫈唔就手 獄中回信難

唔少人都會寫信畀在囚者打氣,不過要回信都有困難。帖文引述Sam話,因為獄中枱櫈高低唔就手,寫字唔係好舒服,上月仲有支筆爆墨,寫唔到太多信,但都好多謝大家寫信畀佢。

同長毛一齊放風 快必驚喜

至於已經還押逾8個月嘅人民力量譚得志(快必),佢嘅facebook管理員每日都會出post講快必近况,噚日就引述快必話,平時放風唔會同社民連梁國雄(長毛)一齊,但噚日竟然安排可以同長毛一齊放風,「佢(快必)話當以為日日嘅安排係一樣,但係時不時又會有些意外驚喜」,又引述長毛話,啲人叫長毛寫回憶錄,但長毛覺得睇唔到將來,寫回憶錄都無用;快必就話面臨種種嚴峻挑戰,仍然要保存盼望,以盼望為基礎回應此時此地困局,「簡單啲講,就係『唔好絕望』」。

相關字詞﹕民主派初選案 張可森 村上春樹 譚得志 民主派初選 區議員 民主派

上 / 下一篇新聞