港聞

港聞二

【Emily】上卿姐節目 被重提叫羅致光「唔好做」 美娟叫不如畀何啟明升局長

【明報專訊】勞工及福利局長羅致光(CK)過往一年多唔肯推失業援助金,多番被建制派批評,工聯會立法會議員麥美娟(Alice)噚日上民主黨劉慧卿主持嘅網台節目《議會內外》,其間卿姐重提舊事,話Alice有次叫CK落台唔好做,Alice就笑言,CK係卿姐舊黨友,「不如佢(CK)唔做,畀我黨友做」,講緊嘅係副勞福局長何啟明。佢認為都反映制度問題,「政府有幾多人關注勞工基層聲音?有幾多人真係貼地?」

麥問以前點同CK共事

卿姐:其實唔係好熟

Alice係受訪者,但節目期間忍唔住反問卿姐,以前到底點同CK做同事,「佢喺你哋民主黨時,係咪都係咁?都係唔聽人講嘢?」卿姐就話同CK其實唔係好熟,因為佢入民主黨時,CK已唔係中委、多數時間都喺大學。

Alice直腸直肚形象深入民心,噚日節目一開始,卿姐第一句就話,好多人聽到麥美娟上佢節目,就問「佢係咪好惡㗎」,問Alice點解公眾形象咁惡。Alice就話,有人話佢唔笑時個樣好惡,又話佢「串嘴」,佢自己係唔鍾意兜彎抹角講嘢,好唔鍾意啲人講完嘢後都唔知講乜。

相關字詞﹕劉慧卿 羅致光 麥美娟

上 / 下一篇新聞