港聞

港聞二

【Emily】人權新聞獎最佳新聞圖片6強 明報佔3

【明報專訊】2021年「人權新聞獎」公布今年一人一票「最佳新聞圖片獎」候選名單,評委揀選咗最後6強畀大家投票,明報攝影記者佔3席,公眾可即日起至4月22日,去「人權新聞獎」官方網頁投票,結果會喺5月6日公布。

明報攝記嘅作品,包括一對長者相擁嘅「疫下生死相許」相片。因應新冠病毒爆發,老人院舍自去年2月中不准探望。77歲嘅陳先生,太太疑喺老人院因食物「落錯格」致肺炎,於是接太太返屋企獨力照顧,每日忙到凌晨3、4點先有得瞓,可惜求助無門。

另外兩張相同社會運動有關。其中一張係去年7月1日,警方首次向七一遊行發反對通知書,大批市民「照舊」上街,相片拍下警方水炮車下晝駛到灣仔時,向一個著住反光衣嘅記者射催淚水劑。另一張相係喺去年9月6日 ,當日原定係立法會換屆選舉投票日,但政府以疫情為由押後選舉一年,有網民發起九龍大遊行,相片拍下其間一對未成年兄妹被捕,畀3個警察按住嘅哥哥奮力伸出右手,希望拉住妹妹。

■投票可到:https://humanrightspressawards.org

相關字詞﹕七一遊行 人權新聞獎

上 / 下一篇新聞