港聞

港聞二

【Emily】鍾翰林獄中信:囚友好奇周庭係咪靚

【明報專訊】《港區國安法》被告、現時19歲嘅「學生動源」前召集人鍾翰林(圖),已經喺獄中生活超過4個月,佢嘅facebook噚日上載佢首封獄中信報平安,佢話仲記得第一日入獄,囚友都對佢投以好奇目光。佢又講到同囚友相處,話有啲囚友會問及相對有趣嘅問題,例如「周庭係咪真係好靚㗎? 」、「游蕙禎係咪真係同梁頌恆有路㗎?」等。

感激追車師旁聽師 感動眼濕濕

鍾翰林喺信中話,喺監獄冇太大恐懼同唔適應,4個月以嚟未見過飯餸有「任何一隻曱甴(啡色嗰啲)同埋老鼠」,最難適應嘅係集體生活。佢話有留意呢幾個月新聞,最難受係不斷見到社運好友相繼被捕、還押、甚至被迫流亡海外。佢又話非常感激每個「追車師」,「有時真係感動到好眼濕濕」,仲有「旁聽師」坐爆庭。

牆外手足寫信撐還押者

「35+大搜捕」被捕人之一、民主黨尹兆堅還押逾月,單獨喺「水飯房」囚禁,牆外嘅手足用不同形式支援,黨友韓俊賢噚日喺青衣派寫信套裝畀市民「寫信撐阿尹」,有市民喺尹兆堅facebook留言「尹生,加油呀!我哋唔會忘記你為香港人所受的苦」。

有小朋友寫信畀「35+大搜捕」另一還押者、新民主同盟范國威(Gary),喺信上畫埋Gary人像,問候Gary身體情况,話「縱然不及在家裏那麼舒服,求天父給您平安和盼望」,抄上《聖經》詩篇23:4:「我雖然行過死蔭的幽谷,也不怕遭害,因為你與我同在,你的杖、你的竿都安慰我。」

相關字詞﹕鍾翰林 范國威 尹兆堅 35+大搜捕

上 / 下一篇新聞