港聞

港聞二

【Emily】海園川金絲猴誕港產第三胎

【明報專訊】海洋公園嘅動物家庭最近增添新成員!公園話,第三隻本地自然繁殖嘅川金絲猴BB喺3月初出世,因為佢嘅毛髮係金黃色,所以幫佢改名做「小黃豆」,亦代表黃豆喺播種後成為生命嘅延續。公園又話,小黃豆嘅川金絲猴媽媽樂樂之前生過BB,所以今次照顧新生嘅小黃豆就更熟練。海洋公園提醒,為咗畀川金絲猴靜靜地哺乳,「香港賽馬會四川奇珍館」嘅川金絲猴展區正局部關閉。

11月至今 24企鵝出世

另外,自從舊年11月起,24隻企鵝BB亦相繼喺海洋公園出世,包括兩隻國王企鵝、一隻南跳岩企鵝同21隻巴布亞企鵝。公園話,動物護理團隊正喺呢個繁殖季節忙於迎接小企鵝,畀心機照顧佢哋,確保企鵝BB健康成長,盡快適應群居生活。

上 / 下一篇新聞