港聞

港聞二

【Emily】會否做選委會召集人? 董生話唔回應

【明報專訊】全國人大常委會修改《基本法》附件一後,選舉委員會將增設召集人制度,必要時召集選委會會議,總召集人講明係由擔任國家領導人嘅選委會委員擔任。特首林鄭月娥前日講應該係兩名全國政協副主席其中一人,咁究竟係董建華定梁振英做?全國人大常委譚耀宗噚日話,自己唔講邊個比較合適,避免唔公道,但如果係論資排輩就可以計年資。董生係首任特首,會唔會樂意擔任?佢透過發言人話唔會回應有關問題。

譚耀宗:如論資排輩 可計年資

另一名有資格做總召集人嘅梁振英前日就話,過去長時間從事公職幾十年,有能力、香港社會有需要、國家有需要的話就盡力做。譚耀宗噚日喺民建聯facebook直播被問到如果出任咗總召集人但又想選特首,又得唔得,佢話涉及選舉就要小心,如果某人宣布出嚟參選,影響到選舉公正性,就唔可以參與選委會總召集人工作。

另外,董建華及太太趙洪娉、梁振英同前律政司長梁愛詩噚日喺政總接種第二劑科興新冠疫苗。董生接種後大讚疫苗「好嘢」,仲話「梗係唔痛啦」,鼓勵大家盡快接種。

相關字詞﹕選委會總召集人 梁振英 董建華 譚耀宗

上 / 下一篇新聞