港聞

港聞二

【Emily】袁嘉蔚想巴斯光年陪 fb管理員徵畫

【明報專訊】民主派立選初選案中,有36名被告仍要還押,外界書信對佢哋而言係重要嘅打氣。南區區議員袁嘉蔚嘅facebook管理員出帖,透露袁嘉蔚喺獄中好悶,並好想有巴斯光年陪佢過復活節,所以號召各位「南區太空戰士」,齊齊畫巴斯光年送畀袁嘉蔚;雖然係無獎比賽,但每幅作品都會寄入去畀佢評鑑同欣賞,截止收件日期係4月7日。袁嘉蔚喺被起訴前曾經接受傳媒訪問,透露自己每晚都攬住巴斯光年公仔瞓覺。

沙田區議員黃文萱就協助收信、寄畀一眾在囚者,佢話見到好多朋友話唔知寫乜好,但牆內嘅人最想就係收到信,內容無論日常生活、畫畫、教學都好,「一句加油,對佢哋嚟講已經係撐落去嘅力量」。黃文萱話會繼續收大家嘅信,「幾多封都會接」。

李家超斥「同黨」抹黑懲教

另外,近日懲教署喺還押者「私飯」、物資安排處理受到質疑,保安局長李家超噚日喺網誌話,唔少罪犯或疑犯因在「黑暴」期間犯法還押,佢哋嘅「同黨」刻意抹黑懲教署,「接二連三用失實的報道、以偏概全、妖言惑眾,詆譭懲教人員、抹黑懲教署的保安檢查制度」,佢話要譴責「無恥之徒」刻意詆譭署方,「這些卑鄙行為不會得逞」。

相關字詞﹕民主派初選案 袁嘉蔚 民主派

上 / 下一篇新聞