港聞

港聞二

【Emily】少訊搞STEM比賽 500獎共28萬獎金

【明報專訊】政府積極推動STEM(科學、科技、工程及數學)教育,連少年警訊都搞中小學生STEM比賽,少訊話希望學生喺比賽諗啲創新方案,喺出行、生活、環境同經濟4個範疇實踐「智慧城市」概念。比賽設各組冠亞季軍,仲有最佳演繹獎、最佳製作獎、最積極參與學校獎等超過500個獎項,獎金總共28萬元。警察公共關係科(社區關係)高級警司范楚芬話,獎金支出由少年警訊中央諮詢委員會從募得捐款中撥出。

有人可能好奇少訊同STEM有咩關係?警察公共關係科總警司郭嘉銓話,少訊宗旨之一係培育守法奉公嘅青年領袖,而政府近年推廣智慧城市,所以少訊想搞比賽令學生更關心社會,用知識建設香港。中學組得獎者可以參加「大灣區科技學習交流團」,郭話內地好多機構嘅創科做得好好,希望年輕人可以到當地交流。不過由於疫情有變數,交流團細節未定。

至於警隊同青少年嘅關係,郭嘉銓話雙方關係一直「好緊密」、「良好」,又話無論有冇社會事件,警方喺青少年發展都投放好多資源,但過去一年幾學生因為疫情少咗返學校,令少訊搞唔到活動之餘亦冇主動招募會員。佢希望疫情紓緩後可以搞多啲活動,「多啲交流自不然多啲溝通,多啲溝通自不然關係就密切啲」。

相關字詞﹕警察公共關係科 警方 郭嘉銓

上 / 下一篇新聞