港聞

港聞二

【Emily】學生提議訪警總 珠海新傳系同PPRB交流

【明報專訊】2019年反修例風波爆發,唔少記者採訪時遭警方粗暴同不禮貌對待,警媒關係要修復並唔易。Emily發現,珠海學院新傳系學生早幾日去咗警察總部,同PPRB總警司郭嘉銓交流。經了解後,原來今次交流活動係由學生主動提出,負責導師話學生有好多嘢想知、想問警方,討論內容包括警媒關係、前線警員不禮貌等,強調並無任何前設。

對警媒關係表達「極度關注」

根據珠海學院新傳系facebook,十幾個學生星期三去咗警總參與交流會,學生對當前警媒關係表達「極度關注」,特別係反修例期間,前線警員同現場採訪嘅記者關係日趨緊張,亦問到警員對待記者有咩守則,點樣改善關係等。

珠海學院新傳系高級講師李家聰話,今次活動唔係校方安排,而係佢問學生希望參觀邊度,佢哋話想參觀PPRB,有好多嘢想問,於是安排。佢強調交流並無任何前設,學生問乜都得,警方事前亦唔知問題。佢認為學生嘅要求合理,亦覺得將來做記者,「係咪認為對方做得唔啱、政見唔同,就唔訪問呢?」佢話學生面對高官時不卑不亢,作為老師好欣慰。

郭嘉銓:疫下停活動 盼續類似交流

郭嘉銓噚日話,早幾日到警總交流嘅除咗珠海學院學生,仲有中大新聞學碩士生,佢哋主要對政府機構公共關係策略、警方同傳媒關係等議題有興趣,仲話當日有「幾熱烈嘅討論」。佢又話,警方以往有同唔同院校交流,但過去一年幾因為疫情,好多活動停咗,好希望日後繼續有類似交流活動。

相關字詞﹕郭嘉銓 反修例風波 警媒關係

上 / 下一篇新聞