港聞

港聞二

【Emily】13地點推「城市景昔」 AR穿越睇歷史圖像

【明報專訊】疫情下市民仲未可以出外旅遊,政府就話會為旅客重臨做好準備。旅遊事務署噚日推出「城市景昔」項目,喺中環、尖沙嘴13個指定地點,利用擴增實境(AR)技術,重新設計旅客指示標誌,市民下載手機應用程式,再掃描標誌上嘅「AR時鐘」,就可以睇到由歷史照片同本地青年藝術家畫作整合而成嘅360度全景歷史圖像,即場對比今昔景觀,亦可睇到主要地標嘅相關資訊。

Emily去中環實測,個App用起嚟大致暢順,仲可以見到輪船以前喺維港航行、人力車伕喺皇后像廣場附近行過嘅動畫,不過掃描時就要喺正時鐘嘅中央,稍為斜少少都用唔到。Emily問過部分市民,唔少人唔太留意到新標誌有咩特別,但就覺得可以即場睇到歷史場景幾得意,有興趣下載;亦有人話手機唔夠data,想下載都冇辦法。

項目由旅遊事務署委託城大研發和製作,預計稍後陸續擴展至其他地區。商經局長邱騰華話,「城市景昔」係推動文化、創意同智慧旅遊嘅重要項目,會繼續提升香港景點嘅吸引力,展現香港嘅獨特文化同歷史。

相關字詞﹕旅遊事務署 擴增實境 城市景昔

上 / 下一篇新聞