港聞

港聞二

【Emily】出席網上峰會 轟台前防長明顯挑釁 葉劉聞「台灣是國家」即離場

【明報專訊】行政會議成員、新民黨主席葉劉淑儀前日出席一個網上高峰會時,聽到台灣與會者用「國家」(nation)嚟形容台灣,立即打斷對方,話台灣並非一個國家,而係中國一個叛離省份(renegade province),然後憤然企起身「離場」。葉太噚日同Emily講,對呢啲「台獨」思想非常反感,認為不能接受,日後再遇上類似情况都會走人,以示抗議。

蔡明憲提「武漢肺炎」 葉劉斥污名化

葉太前日以視像方式出席「WION TV 全球高峰會」,討論有關全球應對疫情。同場嘅仲有台灣前國防部長蔡明憲,蔡明憲用英文發言時,以「武漢肺炎」(Wuhan Virus)稱呼新冠病毒;葉太當場打斷,話對方唔應該將武漢污名化,警告如果再聽到「武漢肺炎」,佢會退出會議。話音剛落,蔡明憲就形容台灣係一個國家,葉太立即「離場」抗議,從熒幕上消失,主持人都挽留唔住;蔡明憲就笑咗出聲。

葉太同Emily講,「蔡某人」特登叫「武漢肺炎」,明顯係挑釁,旨在挑起歧視;而且台灣好明顯唔係國家,所以佢憤然離場。

相關字詞﹕新冠肺炎 台灣 葉劉淑儀

上 / 下一篇新聞