港聞

港聞二

【Emily】陸頌雄走去洗廁所 甩漏多認失禮

【明報專訊】工聯會陸頌雄「轉行」洗廁所?為咗宣傳工聯會嘅公廁清潔證書課程,陸頌雄拍片串演清潔工人,喺男廁挑戰洗尿兜、坐廁,又抹鏡同洗手盤;點知畀課程導師話問題多多,清潔時連膠手套都冇戴。陸頌雄都知衰,話知道自己多甩漏,「實在太失禮喇,清潔實在係件唔容易嘅事」。

扮殺手Leon 宣傳清潔公廁課程

宣傳短片名叫「這個廁師不太冷」,噚日新鮮出爐,一開場就見陸頌雄著住黑色長褸、戴黑超,造型類似電影《這個殺手不太冷》嘅殺手Leon。陸之後攞住一盆年桔公仔,又用兩個清潔噴壺扮槍射人,喺馬頭角道公廁隔籬行來行去,chok咗差唔多成分鐘,佢先除褸露出入面嘅地盤工人反光衣,短片浮起「公廁洗淨師」嘅字幕。

政府委託僱員再培訓局推出「特別‧愛增值」計劃,工聯會有份協助開辦課程,將提供公廁清潔實務知識基礎課程,教授清潔、除污知識,同講述公廁裏面嘅設施,完成課程同考試及格後,學員可獲得僱員再培訓局發出嘅證書。工聯會亦提供中醫保健、建造裝修等課程,學費全免,報讀冇學歷要求,學員亦有培訓津貼。

相關字詞﹕廁所 特別愛增值 陸頌雄

上 / 下一篇新聞