港聞

港聞二

【Emily】中學立志做議員 余德寶預告會宣誓

【明報專訊】政府正修例,要求區議員宣誓先可以繼續做議員,連日來部分民主派議員已公開話願意宣誓。公民黨油尖旺區議員余德寶噚日亦表明,「我會宣誓」;至於黨內其他區議員立場如何,余德寶同Emily講,公民黨稍後會交代,而佢自己衡量過,宣誓與否、做或唔做,一切政治後果最終係個人去承受,所以由自己公布。公民黨主席梁家傑就同Emily講,就公民黨區議員宣誓係咪採取統一立場,要待執委會進一步討論,未有定案。

梁家傑:公民黨未有定案

現實情况係,區議員就算肯宣誓,政府都可以唔接受而DQ。余德寶就話,睇唔到公民黨或自己,有做過乜嘢違反《港區國安法》,個人政治背景唔應該成為DQ嘅理由。佢又話街坊對佢肯宣誓有唔同意見,支持佢留任多啲,普遍都尊重佢嘅決定。

話市民投票想換走「忠誠的廢物」

余德寶話,回到初心,中學時期已立志做議員,大學期間已經喺社區深耕細作,畢業後第一份工作就係區議員,話自己將「人生最青春8年貢獻在社區」;又話一年多前,市民排長龍去投票,民主派贏咗17個區,市民係想將「忠誠的廢物」換走。但無論如何,佢話尊重唔同議員嘅抉擇,「因為選擇留下、離開也是困難」。

相關字詞﹕余德寶 區議員宣誓

上 / 下一篇新聞