港聞

港聞二

【Emily】石牆花急徵40g M&M's朱古力 轉新包裝停售 懲教未改認可清單

【明報專訊】對於送畀在囚者嘅物資,懲教署規定一向好嚴格,包括規定M&M's要係40g包裝。近月M&M's廠商停售40g包裝,改為推出37g包裝,但懲教署遲遲未更新認可物品清單,唔少協助在囚者嘅人都大嘆苦惱。致力倡議囚權嘅社企「石牆花」噚日話,每月要處理近百「手足」嘅物資,對40g包裝M&M's需求非常龐大,呼籲市民如果見到合資格嘅M&M's,可以喺辦公時間捐去石牆花,但現階段就唔需要其他物資。

帖文一出,即刻有唔少人分享、又互通消息講邊度有貨。公民記者蕭雲就話,已經就此問懲教署,「但答案竟然係叫我地去士多搵」,唔少區議員都呼籲,如果有合資格包裝嘅M&M's,可以交去議辦,再由佢哋轉交石牆花。據Emily所知,各方都非常踴躍幫手搵,邵家臻形容係「糖心風暴」呀。

47名民主派因組織、參與初選被控「顛覆國家政權」,當中唔少人係區議員,包括觀塘區議員李嘉達。

李嘉達適應還押中 入結他等批

觀塘區議會主席蔡澤鴻早前去探李嘉達,佢同Emily講,李嘉達𠵱家都係努力適應中,但就冇瘦到,主要係諗辦事處點處理。李嘉達以前玩樂隊、做主音,唱歌幾好聽,蔡澤鴻話佢都有要求入結他,𠵱家等緊當局批准。

相關字詞﹕石牆花 顛覆國家政權 懲教署 區議會

上 / 下一篇新聞