港聞

港聞二

【Emily】阿尹獲多國囚友禱告祝褔

【明報專訊】民主派35+初選案仲有36人還押,其中民主黨尹兆堅星期二會到高院申請保釋。阿尹嘅黨友張文光同羅健熙噚日去收押所探佢,黨友話阿尹精神仲幾好,仲會講笑,又話阿尹識到唔同國籍嘅囚友,有泰國囚友通知曼谷家人,代阿尹向四面佛禱告;有越南囚友就向佛禱告;巴基斯坦囚友用穆斯林方式為阿尹禱告;印度囚友用錫克教方式禱告,樞機同牧師去探望佢時,亦有為阿尹禱告。

獲囚友教潤手露gel頭

阿尹亦公開畀太太仔女嘅家書,安慰家人。佢話身處嘅囚室好似「小聯合國」,有唔同種類犯事嘅人。佢話監獄內物資有限,囚友有唔少犀利嘅「發明」,話有囚友見佢上庭前披頭散髮,錯愕地問:「嘩,你做咩唔gel吓個頭啊?」囚友教阿尹可以用潤手露gel 頭。

黃碧雲感恩唔使大欖慶生

至於能夠保釋嘅黃碧雲噚日生日,佢話唔使喺大欖懲教所過生日「已經十分感恩」,話噚日去完警署報到,再同家人食飯,午夜之前要返屋企宵禁。佢話在囚12日,輕咗4.5磅,血壓卻升至173/95,返屋企一星期後,血壓已回復正常。佢又引用聖經句子,「惟願公平如大水滾滾,公義如江河滔滔」,生日願望係其他在囚者早日重獲自由。

相關字詞﹕黃碧雲 尹兆堅 35+大搜捕

上 / 下一篇新聞