港聞

港聞二

【Emily】Lester:收信係重要精神支柱

【明報專訊】47名民主派人士因組織、參與初選被控違反《港區國安法》,當中36人要還押,雖然身陷囹圄,好多人心繫地區工作。荃灣區議員岑敖暉(Lester)facebook刊登獄中書簡,話估計3至5年見唔到大家,相信區內短期都唔會有新嘅區議員,「自己社區自己救」精神更顯重要,寄語市民唔好睇小自己嘅力量,「無咗區議員完全沒甚大不了」。

雞體函囑港人勿睇小自己

曾形容自己寫揮春係「小學雞字體」嘅Lester,今次用原子筆寫信,笑言「相信呢個世界上最睇得慣雞體的就是諸位」。至於獄中生活,佢話自己快速適應,赤柱監獄膳食冇傳聞中咁令人聞風喪膽,每日生活規律,10點瞓覺、6點半起身,日日運動同食大量菜,平時就係讀書、讀報、讀信及寫信,形容收信係好重要嘅精神支柱。

工盟為Carol召喚繪畫師

另外,職工盟噚日都出post,話好多人都想寫信畀前主席吳敏兒(Carol),但拎起支筆又唔知寫咩好,諗起Carol好鍾意藝術,不如搞個「復活節繪畫比賽」,大家以復活節為題畫畫寄畀Carol,等佢喺獄中鑑賞並揀出三甲,話相信對佢而言都係好開心嘅娛樂。職工盟仲叫大家寄畫時要寫埋「Carol教練,我真係好鍾意畫畫啊!」

相關字詞﹕顛覆國家政權 岑敖暉 吳敏兒 職工盟 區議員 民主派

上 / 下一篇新聞