港聞

港聞二

【Emily】懲教署長話想學中式步操 入境海關:有派員取經

【明報專訊】各紀律部隊首長噚日齊齊去咗中央圖書館展覽館接種科興疫苗,離開時被問解放軍教中式步操一事,懲教署長胡英明回應話,署方部署咗一段時間學中式步操,計劃分階段轉用,視乎儀仗隊表演效果,唔排除日後全部轉晒用中式步操。佢又話自己鍾意學新嘢,想學中式步操。

鄧炳強:現無計劃改 但與時並進

其他紀律部隊回覆時都確認,日前有派員去跟解放軍駐港部隊學步操。入境處話,為突顯香港係國家不可分割嘅一部分,處方自1999年起已將中國步操元素融入會操,現時不定期派員跟解放軍學習,確保步操動作更標準及合乎規範。海關回覆稱,不時審視及評估唔同步操方法,正計劃分階段引入中式步操,已經派員同解放軍駐港部隊人員就步操培訓交流。

警務處長鄧炳強話,一向會邀請唔同團隊交流步操方式,無計劃更改𠵱家嘅步操方式,但會與時並進,檢討步操方式。消防處話,有派員參加解放軍教授嘅步操培訓,擴闊人員喺步操及儀仗活動嘅知識、技能及視野,但暫時無計劃更改結業典禮及升旗儀式嘅步操方式。

上 / 下一篇新聞