【明報專訊】政府噚日公布《2021年公職（參選及任職）修訂條例草案》，非建制派嘅區議員除咗擔心被取消資格（DQ）外，更有可能喺DQ後被追討議員薪酬。荃灣區議員岑敖暉就公開佢嘅戶口積蓄，叫政府追飽佢。
稱有樓破產會肉痛 「窮有窮好」
去年參選立法會時被取消資格嘅岑敖暉，佢噚日就喺facebook公開自己接近「清零」嘅綜合戶口。佢話，區議員日後可能被DQ及追討薪酬同開支，而戶口有幾十萬、供緊樓或有幾層樓嘅，畀人追到破產會肉痛；但因為佢畀民政事務總署扣咗開支好耐，戶口只得番六毫子，感悟到「窮有窮好」，仲叫政府慢慢追飽佢。有人就喺岑敖暉個帖文度留言，話會買定啲雜餅畀佢，亦有人感謝佢為海濱海灣居民付出。