港聞

港聞二

【Emily】胡志偉函阿臻謝石牆花 還押中「三高」受控

【明報專訊】目前正還押嘅民主黨前主席胡志偉,喺鼠年最後一日(2月11日)寫信畀關注囚權組織「石牆花」創立人、立法會前議員邵家臻。志偉信中提到,佢喺獄中嘅待遇,都係阿臻同一班爭取囚權朋友努力嘅成果,佢表達由衷謝意。佢提到現時作息規律,加上控制飲食同早睡早起以及藥物協助,「三高」問題似乎已控制喺安全水平,囑咐阿臻都要正視健康,「以便走更遠的路」。

志偉又話,收到好多「石牆花」嘅來信,令佢感到「吾道不孤」,又指面對專權從來都要小心翼翼尋找對策,但總原則係永不放棄,仲以石牆花比喻,話石牆花雖然生長喺貧瘠嘅環境,但只要有強大嘅生命力同堅持信念,必定會有開花結果嘅日子。

話來信令佢覺得「吾道不孤」

阿臻話,聽聞志偉還押期間唔食「私飯」,認為可以同其他囚友一齊捱,佩服志偉做法,並祝願志偉身體健康。佢又話,知道民主黨會統籌探訪志偉嘅工作,佢已經排隊喺3月8日之後探監。

相關字詞﹕還押 三高 邵家臻 胡志偉

上 / 下一篇新聞