港聞

港聞二

【Emily】城大新校歌 郭位填詞「和而不同」 副校話「政『教』分離」 無受國安教育壓力

【明報專訊】特首林鄭月娥上年講過,大學增加國安宣傳同教育係「責無旁貸」。城市大學噚日舉行新春聚餐,副校長(發展及對外關係)李國安被問到城大落實國安教育嘅進展,佢強調城大「政『教』分離」,「學校梗係教學同研究,其他啲嘢其他人做」;又話大學喺國安教育冇受過任何壓力,一切工作依舊。

城大校長郭位等多名大學管理層噚日出席聚餐,活動上城大播新校歌畀傳媒「先聽為快」。校方話,校歌用咗大約半年製作,由著名創作人李峻一作曲,歌詞有廣東話、英文同普通話3個版本,當中「多元文化 和而不同」呢句歌詞,喺郭位填寫嘅普通話版本出現咗兩次。

PR取消問答環節

郭位走先 副校答記者

郭位話,城大學務副校長Christian Wagner係德國人,而校內好多系主任由女性出任,可見大學推廣多元文化。佢話就算意見唔同嘅人都可以做朋友,不過社會嘅情况成日都相反,佢認為社會要進步,就要推廣多元文化。

噚日Emily本身準備咗唔少問題,想問吓城大管理層,可惜大學公關喺活動臨近尾聲時話,由於延誤及活動要兩個鐘內完成,所以取消問答環節,郭位同幾名管理層先行離開,得番李國安答記者提問。

相關字詞﹕城市大學 郭位 政教分離

上 / 下一篇新聞