港聞

港聞二

【Emily】大嶼山研環島遠足徑 全長100公里

【明報專訊】疫情下唔少人湧去郊遊,離島係其中一個熱點。發展局長黃偉綸噚日喺網誌話,可持續大嶼辦事處正研究改善大嶼山遠足徑同網絡,希望整合一條總長度約100公里嘅環嶼遠足徑(圖中綠色線)。當局亦希望大嶼山成為公眾度假嘅好去處,其中擴建梅窩越野單車徑網絡同建造練習場,以及芝麻灣越野單車徑網絡擴建工程已大致完成,相信對行山同越野單車發燒友嚟講係好消息。

黃偉綸話,辦事處根據「北發展、南保育」等原則,為大嶼山嘅保育同康樂措施提供指引框架,例如西北大嶼山昔日結聚多條古村,為咗保存文化氛圍,當局正分階段研究;南大嶼山海岸嘅藍綠資源豐富,有貝澳嘅濕地、水口嘅沙坪等,生態康樂潛力可以進一步提升。

2018年施政報告提出設立10億元「大嶼山保育基金」,用以支援落實大嶼山保育工作。第一輪保育及有關項目喺去年12月開始接受申請,審批結果預計今年第3季前公布,有興趣申請基金資助嘅機構或團體可以瀏覽大嶼山保育基金網站。

相關字詞﹕大嶼山保育基金 遠足徑 大嶼山

上 / 下一篇新聞