港聞

港聞二

【Emily】華叔離世10年 六四館辦專題展 展出語錄手稿墨寶 明日開幕

【明報專訊】支聯會創會主席司徒華(華叔)逝世10周年,「六四紀念館」舉辦以華叔為主題嘅專題展,市民聽日(周二)起可入場參觀,毋須預約;展期至3月31日。展覽共有十大重點,包括展出華叔嘅語錄、漫畫肖像、揮春墨寶、寫揮春用嘅文房四寶、書籍,同埋首次亮相嘅手稿等。參觀市民會獲贈一個小茶包,上有華叔寫嘅「飲者樂 壽而康」。

紀念館逢星期一休館,其餘日子都開放,由中午12點至下午6點。支聯會主席李卓人噚日形容「華叔嘅一生係一本歷史書」,呼籲公眾到場參觀。

回應「愛國者治港」

阿人引用華叔:愛國不等於愛黨

盛傳下月全國兩會將修改香港選舉制度,以落實「愛國者治港」。李卓人認為做法可笑,質疑中共有咩資格定義「愛國者」,阿人引述華叔所言:「我愛國,因為看到民族的苦難,我愛我的同胞;但愛國並不等於愛黨,也不等於愛一個政黨」,質疑剝奪人民自由、民主嘅人實際上只愛自己。

李卓人預計下月會開始一連串六四悼念活動,向警方申請不反對通知書,包括六四遊行、集會同長跑,但按慣例警方到5月先會開始商量。至於清明節獻花活動,支聯會已向康文署申請喺尖沙嘴鐘樓舉辦,康文署尚未回覆,李卓人預計獲批機會唔大。

相關字詞﹕六四紀念館 司徒華 支聯會

上 / 下一篇新聞