港聞

港聞二

【Emily】見戲院重開 《香港志》乘機講史

【明報專訊】政府啱啱鬆綁,戲院、按摩院等場所可以重開,有戲院即刻大排長龍。團結香港基金團隊出版《香港志.總述大事記》,噚日見戲院重開,乘機喺facebook講故事,話根據香港志搵嘅資料,本港最早播放電影係1900年11月22日,喺上環荷李活嘅「喜來園」,以蓋蓬棚形式,放映外國風景嘅《奇巧明燈戲法》,內容有山水人物、外國行兵打仗、亭臺樓閣等,係香港首間專門放映電影嘅戲院。

香港志又話,亦有指香港開埠最早嘅戲院係喺上環普仁街嘅「同慶戲園」,1867年建成,後來改名「重慶戲院」,但唔算係正式電影院,而係以粵劇表演為主。而香港首間全華資電影院,就要數到1907年,由李璋、李琪兄弟創辦嘅香港影畫戲院。

團結香港基金成立6年,有唔同項目做緊,日前公布嘅「全球最佳智庫(美國及美國以外)」排名榜中,團結香港基金位列第112名,並喺公共政策影響力等多個範疇中入選百大。

相關字詞﹕香港志 團結香港基金

上 / 下一篇新聞