港聞

港聞二

【Emily】政協人代赴深圳打第二針 何柱國籲引入國藥:唔好執輸

【明報專訊】為咗3月到北京出席兩會,全國政協委員、港區人大代表之前已經上深圳打咗「國藥」新冠疫苗第一針,噚日再分批上深圳打第二針。全國政協常委何柱國喺香港上專車前,同記者講香港應該「有得爭取就爭取(引入國藥疫苗)」,因為全世界都搶緊,唔好「執輸」。記者問佢點睇市民擔心風險問題,佢話:「風險呀?咁多人都打過囉,你仲驚?唔打咪仲驚。」另一常委蔡冠深就唔擔心有不良反應,話上次打完第一針冇不良反應,仲形容「好舒服」。

林健鋒盼內地免港接種者隔離

經民聯副主席、全國政協委員林健鋒喺facebook上載打針過程,仲同個疫苗包裝盒合照。佢話近日疫情稍為緩和,加上另一國產疫苗「科興」即將安排逾百萬劑供港嘅好消息,令市民對經濟復蘇有憧憬。佢期望特區政府下一步向中央爭取,畀已接種疫苗嘅市民可以直接返內地,豁免強制隔離。

相關字詞﹕蔡冠深 疫苗 新冠病毒疫情 全國政協 林健鋒

上 / 下一篇新聞