港聞

港聞二

【Emily】辭任助理勞工事務主任 顏武周:毋須自欺欺人留政府

【明報專訊】政府要求公務員宣誓或簽聲明擁護《基本法》同效忠香港特區等,前「新公務員工會」主席顏武周(圖)噚日宣布,已辭任勞工處助理勞工事務主任,最後上班日係年三十晚(11號)。顏喺facebook發聲明,話要簽聲明係辭職嘅因素之一,但更重要嘅係,佢認為崗位嘅發揮空間已經相當有限,無必要繼續自欺欺人咁留喺政府。

公會剩餘資金捐慈善機構

顏武周喺文中話,「我所失去的只是一份工作,但卻有無法比擬的經驗及歷練,而更為重要的是我有真實地面對自己,在抉擇面前堅定地選擇應該做的事情」。新公務員工會上月解散,顏話解散工作接近尾聲,目前只等待銀行發出取消戶口嘅證明書;又話工會將銷毁所有會員資料,剩餘資金亦已捐贈慈善機構。

對於工會解散,顏武周話明白有人感可惜,甚至質疑2019年嘅抗爭手法無效,但佢認為《港區國安法》嘅出現係轉捩點,證明抗爭方法相當有效,「使到當局甚至需要冒着衝擊香港國際金融中心的風險而去變招應對」,勉勵港人毋須妄自菲薄。顏話目前局勢唔同往日,如繼續用過去嘅方法,就要重估成本同效益,話解散工會同離開政府嘅決定亦係喺呢個環境下作出。

相關字詞﹕公務員宣誓 新公務員工會 顏武周

上 / 下一篇新聞