港聞

港聞二

【Emily】何啟明立會談最低工資 黨友:你耍我哋呀

【明報專訊】曾任立法會議員嘅勞工及福利局副局長、工聯會何啟明,噚日出席立法會人力事務委員會,講解最低工資能否由兩年一檢轉為一年一檢等議題,其間一眾議員,甚至工聯會黨友都批評政府政策。民建聯柯創盛苦口婆心咁話,落區見到基層打工仔「餐搵餐食餐餐清」真係好難過,寄語何啟明「你自己都來自勞工界,做過區議員、勞工界議員,就算換咗崗位、跑道,都應該完全明白打工仔苦况」。

「兩年一檢」遭質疑

何:入政府後明要時間

面對一眾議員質疑點解最低工資係兩年一檢,何啟明話加入政府前都諗唔到點解要咁耐,「加入(政府)後,發現要一段時間」,因政府要考慮嘅較私人企業僱主複雜,要諗嘅除咗打工仔收入水平,仲要諗埋僱主畀唔畀得起。

有關最低工資修訂草案係由工聯會陸頌雄提出,根據《議事規則》,涉及政府政策嘅議員法案要獲通過,須獲特首書面同意。

工聯會麥美娟就話,勞福局長羅致光如果唔支持草案,特首就唔會批,問何啟明有冇同羅致光傾過。何啟明話會詳細研究法案對公共開支、政府政策影響後再回覆立法會。麥美娟就質疑,當局開會前理應討論係咪支持草案,質疑何啟明「即係你耍我哋呀?唔答呀?咁你嚟開會做咩?」

相關字詞﹕麥美娟 柯創盛 最低工資 何啟明

上 / 下一篇新聞