港聞

港聞二

【Emily】考政府工頻道黃黑logo 郭偉强籲跟進

【明報專訊】立法會農曆新年假後「開爐」,公務員及資助機構員工事務委員會噚日朝用Zoom開會,點知唔夠10分鐘就「冧檔」,聽唔到部分議員發言,要休會解決技術問題。事務委員會其中一項議題係「鼓勵青年人加入政府的推廣工作」,工聯會郭偉强就話,政府青少年網站設有「投考政府工」YouTube 頻道,但係logo用上黃黑色(圖),「雖然係好minor(瑣碎)嘅事,但都唔想畀人有不必要嘅聯想,係咪可以做一啲跟進呢?」

公務員事務局長聶德權回應話,該網站由效率促進辦公室負責,佢會向部門反映意見。「投考政府工」嘅logo用上白色字、黃黑色背景,該頻道向公眾介紹唔同公務員嘅工作性質及內容。除咗YouTube頻道,「投考政府工」亦有facebook專頁,截至噚日有近8.5萬人讚好。

講番開會情况,直播一開始委員會主席郭偉强拜年時,明顯聽到有雜音,轉用另一個咪都無好轉。建制派「班長」廖長江提醒,話係咪有技術問題;到民建聯葛珮帆發言時,更加完全聽唔到佢講咩。民建聯何俊賢就話,「由你(郭偉强)話恭喜發財開始,我已經聽唔到你講咩」,提議暫停會議處理問題。會議暫停約5分鐘後重開。

相關字詞﹕聶德權 郭偉强

上 / 下一篇新聞