港聞

港聞二

【Emily】海洋公園今重開 預約系統迫爆

【明報專訊】政府前日宣布今日起有條件放寬部分防疫措施,閉園兩個多月嘅海洋公園今日重新開放,網上預約系統噚日下晝5時開始接受預約;香港迪士尼樂園噚日都宣布聽日(19日)重開,網上預約系統今早10點開始。兩個公園都要求入場者使用「安心出行」App或登記個人資料。

迪士尼明重開 推港人優惠

Emily噚日約5點登入海洋公園網站,已經要線上排隊等待進入,當時顯示有4萬多人正在排隊等候預約,等咗十幾分鐘後終於可以登記名字同電話,但喺選擇人數時自動跳到系統繁忙頁面,直至6點前恢復正常。截至噚晚約7點,14日預約日(2月18日至3月3日)之中已有4日額滿。

聽日重開嘅迪士尼同樣要網上預約入園。樂園推出香港居民專享「雙重慶祝」優惠,可以688元入園兩次。

今日起部分處所如戲院及健身中心都可以重開,唔少戲院噚日已預售今日場次嘅戲票,當中今日開業、位於堅尼地城吉席街嘅高先電影院,有唔少影迷期待,根據電影售票平台,高先電影院今日率先上映嘅《狂舞派3》4場公開售票場次,全部場次均已預售逾半座位。

相關字詞﹕迪士尼樂園 海洋公園

上 / 下一篇新聞