港聞

港聞二

【Emily】林卓廷「戰車」贈外賣步兵 送單車獲響應 搬屋變好人好事

【明報專訊】民主黨林卓廷辭任立法會議員後早排賣樓,噚日喺facebook出post話自己要搬屋,會將「戰車」單車送出,問有無人想要。估唔到帖文一出反應好大,有人傳信息畀佢,話希望幫一個失業朋友搵一部單車送外賣,希望阿廷可以送畀呢位失業朋友。阿廷公開呢個信息,即有幾名支持者響應,提出想捐出單車,變成好人好事。

家住沙田嘅林卓廷噚日話,以往喺新界東出席地區活動,經常被問到有無揸車,佢話佢會揸住部單車游走大埔墟、大圍、禾輋、沙角、石門街市,仲話呢部車「參與過中大之戰」,性能仍然良好。

有人留言想幫失業朋友

阿廷出post話送單車後,唔少支持者留言,有人話部單車有收藏價值,亦有人提出用錢買咗佢。阿廷之後就回覆,話佢嘅生活暫時還可以,叫大家唔使擔心,佢唔會收錢賣車,感謝各位厚意;至於有人話部單車具收藏價值,佢話太抬舉了,實在不敢當。

其後阿廷再講,有朋友見到有單車送贈,話有失業朋友目前做「步兵」送外賣,想要部單車用,所以會送畀呢個人。唔少人睇到post後都話想送單車,同阿廷講可以去收車。阿廷話會收集單車,轉送畀其他有需要嘅人。

上 / 下一篇新聞