港聞

港聞二

【Emily】民記「變革香港」街站被指犯聚 張國鈞:派防疫物資可豁免

【明報專訊】民建聯早前提出「變革香港」,該黨噚日喺多區都有擺街站,向市民拜年兼宣傳,其中民建聯主席李慧琼、副主席張國鈞就去咗小西灣街市外宣傳,除咗講「變革香港」外,又提到希望政府向中央爭取引入國產疫苗等。現時2人限聚令仍然生效,不過佢哋嘅街站不時出現李慧琼、張國鈞同社區主任陳凱榮企埋一齊,令人質疑民建聯係咪有違反限聚令。張國鈞就同Emily講,佢哋除咗宣傳,其實亦有派發口罩,指派發防疫物資係獲豁免嘅。

植潔鈴已轉行 考到督察

3人噚日擺街站嘅小西灣屬「佳曉」選區,民建聯「小花」植潔鈴2018年喺區議會補選勝出,2019年換屆選舉就落敗,噚日民記街站已無植潔鈴蹤影,其facebook專頁原來亦已消失。Emily就聽聞,植潔鈴已經轉行,並成功投考警隊督察。

張國鈞回應Emily查詢時就話,由植潔鈴自己交代去向較好,佢強調「有心服務社會嘅人,喺唔同崗位都會繼續服務市民」。

相關字詞﹕張國鈞 植潔鈴 變革香港 民建聯

上 / 下一篇新聞