港聞

港聞二

【Emily】土瓜灣基層童夾band 視像表演送暖長者

【明報專訊】市建局推動土瓜灣重建嘅6個項目,5個已準備清場,受影響居民陸續搬去公屋或安置單位。市建局2018年成立「市建童樂‧社區樂團」(Kid Band),免費教土瓜灣基層兒童結他、口風琴等,亦讓部分已搬離當區嘅兒童以歌會友。疫情所限,團員轉為網上學音樂同表演,佢哋近日就趁農曆新年做視像探訪安老院舍,為長輩送暖。

佢哋聯同市建局「學建關愛」義工隊、聖公會安老院舍外展專業服務試驗計劃,趁新年前以線上探訪,向九龍城區內3間私營安老院舍嘅院友賀新年。Kid Band除咗大唱賀年歌曲,又同長者傾偈,團員劉倩妍話疫情期間長者無機會外出,好少機會見親友,佢哋喺視像探訪時表現雀躍,主動分享心事,又一齊玩線上小遊戲。

Kid Band現時有46名6至14歲嘅團員,其中23人住緊或住過土瓜灣重建項目範圍內。負責為Kid Band提供音樂培訓嘅社企Addoilmusic,共同創辦人兼社工葉彩霞話,疫情令大部分課外活動暫停,但團員仍可在家學音樂,並獲樂團社工及導師提供適切情緒支援,維持良好健康精神狀態。

相關字詞﹕基層兒童 市建童樂 土瓜灣 市建局

上 / 下一篇新聞