港聞

港聞二

【Emily】轟「設失業保險要叫停積金對冲」論 工盟諷羅致光「思畸」玩威脅

【明報專訊】疫情下失業率一直上升,不同團體曾建議政府設立失業援助金,但係勞福局長羅致光(CK)一直拒絕,佢前日接受商台節目《政好星期天》訪問時再拒絕建議,話失業援助唔公平,更提出如果要設立失業保險制度,就要即時叫停取消強積金對冲,激嬲晒工聯會同職工盟。

羅致光話臨時失業援助唔可取,取消強積金對冲更好,所以如果社會要認真討論設立失業保險制度,只能叫停𠵱家取消強積金對冲嘅工作。職工盟秘書長李卓人喺facebook揶揄稱羅致光果然係「思畸」,鬧對方「玩威脅」,施政邏輯係「玩發爛渣」,反問「思畸」用3000億補助僱主,「唔幫無薪假同失業工人就好公平?」

工聯會權益委員會副主任鄧家彪噚日喺港台《千禧年代》,質疑CK「係咪威脅勞工界不要提出(設立失業援助金嘅)訴求」,希望對方有同理心。職工盟總幹事蒙兆達喺同一節目就批評CK強詞奪理,認為取消強積金對冲,同失業援助金係兩回事。

相關字詞﹕鄧家彪 李卓人 失業援助金 羅致光 失業率

上 / 下一篇新聞