港聞

港聞二

【Emily】大坑火龍文化館 將有客家菜食

【明報專訊】提起大坑,唔少人都諗起舞火龍,但有幾多人知道大坑以前係傳統客家村落呢?發展局長黃偉綸噚日喺網誌話,喺大坑、前身為「孔聖義學」校舍嘅三級歷史建築物,將會活化成大坑火龍文化館,爭取今年中秋節完成活化啟用,市民仲有機會一嘗客家菜。

黃偉綸:爭取中秋啟用

文化館坐落書館街12號,前身係晚清時創立、為窮人提供免費教育嘅「孔聖義學」,樓高3層,採用簡約現代主義風格,強調功能同實用,喺日佔時期遭受嚴重破壞,1949年原址重建,2010年12月獲古物諮詢委員會評為三級歷史建築。

每年舉辦大坑舞火龍活動嘅大坑坊眾福利會,喺2015年獲邀將上址活化成大坑火龍文化館。活化後,文化館設有展覽廳,介紹大坑火龍嘅歷史、起源、火龍紮作工藝同典故等。另外大坑舞火龍同客家風俗有關,所以到時館內亦有以火龍為主題嘅中西餐館,提供客家菜,推廣客家飲食文化。

相關字詞﹕大坑火龍文化館 孔聖義學

上 / 下一篇新聞