港聞

港聞二

【Emily】吳秋北批移英者「睡不醒」 曾鈺成舉華僑為例:去他方≠唔愛國

【明報專訊】立法會前主席曾鈺成日前接受網媒訪問,話要深入反思點解咁多香港人想離開,結果引嚟工聯會會長吳秋北喺facebook隔空駁火,話有啲離港嘅人判斷錯誤,以為英國係殖民時代嘅大英帝國,「有人選擇去盲目,有人選擇睡不醒」。曾鈺成噚日就回應話,睇番歷史,好多華僑都非常愛國,佢唔認為港人去第二個地方追求理想生活,就等於對香港唔忠誠、唔愛國。

曾鈺成噚日出席活動時被問到點睇吳秋北嘅言論,佢就話香港係開放嘅地方,《基本法》亦保障港人自由出入,冇可能「閂閘唔畀人走」。至於香港係咪多咗人移民,曾鈺成話自己冇準確數字,「都係估估吓啫」,但如果真係有移民潮,佢覺得政府應該諗諗,係咪有市民對香港前景唔夠信心呢?

曾鈺成又話,以前好多人講過「行勻晒全世界,返到嚟都係香港最好」,而如果𠵱家「做好自己啲嘢」,好好建設香港同埋一國兩制,就唔使擔心離開咗香港嘅人唔會再返嚟。

相關字詞﹕移民潮 工聯會 吳秋北 曾鈺成

上 / 下一篇新聞