港聞

港聞二

【Emily】「35+」泛民續保帶住「出入平安」 安德里感恩獲「加油」沒被拋棄

【明報專訊】「35+大搜捕」嘅50幾名民主派噚日分別去警署報到同續保,唔少人前一晚喺facebook表達不安。印裔社工安德里(Jeffrey Andrews)喺fb話,堅信自己嘅工作對香港有影響,又話之前喺Carousell買英超球隊曼聯嘅帽,賣家認出佢而畀咗折扣,「還對我說了近期對我意義重大的一句說話『加油』」,同一啲鼓勵說話;佢話非常謙卑同感恩,所有人喺佢最困難嘅時候都冇拋棄佢。護士劉凱文噚日入警署前展示「出入平安」揮春,希望得到加持。

生日正日去續保嘅鄒家成喺fb上載佢吹蠟燭嘅post,話今年24歲生日,嗰種想留住當下嘅感覺比上年強烈,同時更感恩。南區區議員袁嘉蔚就話,「不知道會否與愛我的你們暫別」,知道自己會害怕,所以更會堅強;早排刺咗「Fearless」紋身喺手腕,作為一個提醒、一個記號、一個陪伴,知道港人唔會認輸。人民力量陳志全形容吉凶未卜,擔心最壞情况係即時收押上庭,無論最後結果如何,都「幸不辱命,無怨無悔」。

區軒睇唐君毅著作等續保

噚日成功續保嘅區諾軒(區軒)帶咗唐君毅嘅書《人文精神之重建》喺警署等候期間睇,文末唐君毅嘆道自己嚟到香港著書立說,都「為人而非為己」,區軒話「相信我哋好多參與政治的朋友亦如是。多艱困的格局,一定有它的應對辦法」。

相關字詞﹕陳志全 唐君毅 出入平安 35+大搜捕

上 / 下一篇新聞