港聞

港聞二

【Emily】建制團體踢垃圾袋 「踢走違誓黑暴議員」

【明報專訊】噚日係年廿八,建制派組成嘅「元朗監察議會」噚日喺政府總部出面請願,要求盡快修訂《宣誓及聲明條例》,將區議員納入宣誓要求。元朗前區議員李月民向貼上元朗區議會主席、民主黨黃偉賢頭像嘅大垃圾袋大腳一踢,話要踢走「違誓黑暴議員」。請願有成15人,其間有警察到場了解,「元朗監察議會」成員司徒駿軒向警長出示身分證,警察提示在場各人要「企鬆啲」,但冇檢控佢哋違反限聚令。

聯盟召集人李月民話,區議員宣誓要追溯到現屆區議會,因為區議員參選時簽署嘅提名表聲明已經有法律效力,要嚴謹制度審查係咪真誠宣誓。民建聯立法會議員周浩鼎話,要杜絕區議員「發誓當食生菜」。

特首辦特別助理李惠接收請願信,由於限聚令,各人要喺遠處排隊,再輪流手持請願信同李惠合照。

相關字詞﹕建制派 民建聯 宣誓及聲明條例 限聚令

上 / 下一篇新聞