港聞

港聞二

【Emily】年宵被冚 各方支援 支聯收31萬捐款 超舊年年宵

【明報專訊】支聯會喺維園嘅年宵檔,32年來首次畀食環署冚咗,佢哋賣嘅花由區議員領走,擺街站等派發;又喺網上力谷「尊子畫肖像」呼籲市民捐錢,截至噚日中午收到31萬,仲多過上年喺維園擺檔賣花。

「尊子畫肖像」助籌8.7萬

支聯會噚日發新聞稿,話感謝各方友好義助,喺支聯會被迫撤離維園時接收鮮花,其後有市民捐款領花;支記亦感謝政治漫畫家尊子出手襄助,義務為捐款巿民畫肖像,但因報名踴躍,新捐款嘅市民,肖像要過年後先收到。支記中人同Emily講,因為地區議辦唔可以「賣」花,市民都係隨緣樂助,估計派花多過收錢,不過支記都收到一個葵涌區議員近2000元嘅花錢,大坑市集亦有1.2萬元代捐款收入。

支聯會初步統計,截至噚日12點,戶口共收到超過31萬,共318次入帳,平均每次980元;有146個市民報名「尊子畫肖像」,收到8.7萬捐款。睇番支記盤數,佢哋舊年喺維園年宵擺檔賣年花,收入25萬,今年雖然唔可以開檔,但收到31萬嘅捐款仲多過上年。

相關字詞﹕支聯會

上 / 下一篇新聞