港聞

港聞二

【Emily】江樂士公開信致委員會主席:只有港警值得攞和平獎

【明報專訊】民主黨創黨主席李柱銘、「香港民主運動」近日先後獲提名諾貝爾和平獎,前刑事檢控專員江樂士(圖)噚日喺《中國日報》發表以諾貝爾和平獎委員會主席安德森(Berit Reiss-Andersen)為對象嘅公開信,當中再指香港只得警察值得獲諾貝爾和平獎,形容警察係「真英雄」,以專業面對挑戰,包括控制「暴徒」,守護法院、公共設施及大學等,為街頭同港人生活帶來和平、穩定。

讚「真英雄」 為港人帶來和平

美國國會及行政當局中國委員會(CECC)早前提名「香港民主運動」獲和平獎,江樂士喺文中話,委員會主席魯比奧(Marco Rubio)、麥戈文(James P McGovern)聲稱示威者係和平,但冇提到佢哋對香港鐵路、理大、立法會等造成嘅損害,甚至有內地遊客遇襲。

江樂士話,有意摧毁香港嘅人最終失敗,大部分係因為香港警察嘅勇敢,加上《港區國安法》嘅制定,令香港回歸穩定。

翻查資料,江樂士去年9月已經話無人比警隊更適合獲頒和平獎,當時「香港政研會」發起聯署支持,立法會議員何君堯亦轉載連結,不過Emily暫時未聽聞有人提名香港警察。

相關字詞﹕李柱銘 香港民主運動 諾貝爾和平獎 江樂士

上 / 下一篇新聞