港聞

港聞二

【Emily】陳肇始籲拜年唔好食嘢 傾偈戴罩

【明報專訊】農曆新年將至,可能唔少人仲會拜年、聚會,對抗疫而言係一大挑戰。食物及衛生局長陳肇始噚日喺商台節目《政好星期天》話,明白大家要拜年,但呼籲盡量減少、時間縮短,又叫大家喺屋企食完嘢後,傾偈時戴番口罩,「(拜年)唔好食嘢就當然都希望呼籲,但明白係有一定困難,但係都可以比較謹慎」。

陳肇始又喺網誌提及上周同食環署長去北角,探訪清潔街道嘅前線人員,亦送上小小心意打氣。

羅致光叮囑抹窗注意安全

唔少司局長噚日發表網誌,都同大家拜個早年。勞福局長羅致光就叮囑大家歲晚大掃除要注意職安,特別提醒近期都有懷疑抹窗墮樓嘅意外,強調外傭「標準僱傭合約」加入咗清潔外窗條款,保障外傭職業安全,如果僱主要求外傭喺違反合約條文下抹外窗,外傭可以拒絕。

羅致光又話,去年有同事幫父母大掃除,其間冇戴口罩,結果感染細菌咳足多日,呼籲大家大掃除都要戴好口罩。

羅致光又關注工業意外事宜,話希望未來加強宣傳教育、提高一般僱員安全意識,就算係文員要攀高攞文件,都應該有基本工業安全意識。

相關字詞﹕拜年 網誌 羅致光 陳肇始

上 / 下一篇新聞