港聞

港聞二

【Emily】區議員為街坊寫揮春 「真係無人 唔好爆門」大熱

【明報專訊】下周就係牛年,唔少區議員都會為街坊寫揮春應節,不過,近期最流行嘅揮春語句,唔係「出入平安」、「身體健康」呢啲傳統祝賀語,而係「唔好爆門」!

話說政府日前表示,喺「受限區域」執行強制檢測公告時,發現多個單位住戶冇應門,但有理由相信單位內有人,政府可能採取法律行動,包括向裁判官申請手令破門進入單位。

中西區區議員葉錦龍日前幫街坊寫揮春時,就寫咗「真係無人」、「唔好爆門」;佢仲話係咪要「量產」呢批揮春畀街坊。沙田區議員黃文萱都寫咗「真係冇人」、「咪X破門」,形容係近期最熱門嘅揮春。

余若薇揮春議辦派

籲支持612基金

此外,公民黨立法會前議員余若薇出名寫字靚,佢近日就寫揮春向港人送上祝福,同時呼籲大家繼續支持「612人道支援基金」,有興趣嘅市民可以喺特定時間去公民黨區議員辦事處索取,不過得部分區議員先有派發,記住先上公民黨facebook望望呀!

上 / 下一篇新聞