港聞

港聞二

【Emily】李慧琼體質敏感照打國藥 接種完都覺好瞓咗

【明報專訊】全國人大代表、政協委員日前集體上深圳打國藥疫苗,為3月到北京參加兩會做準備,政協常委唐英年就透露因自己體質「超級敏感」而冇參與。政協委員、民建聯主席李慧琼(Starry)噚日同傳媒見面,話原來佢嘅體質都係「比較敏感」,但就有打國藥疫苗,仲話「幾好㗎」。

話自己打針較易發燒

點樣敏感法?Starry話自己打流感針都會比較容易發燒,打完疫苗嗰日真係如全國人大常委譚耀宗所言「好瞓咗」,但佢就覺得係攰,因為當日打完針就要落區協助受到強制檢測影響嘅市民。佢仲話打完隻手有少少痹,但係普遍接種者都無反應,佢算係有少少反應。

被問到要上兩會係咪都應該要打疫苗,Starry話「唔好咁樣講」,因為每個人對自己身體狀况都有最實際嘅理解,自己要判斷。有記者追問唔打疫苗觀感會唔會唔太好?佢解釋,自己對疫苗有敏感,「唔會咁睇,我都唔係每年打流感針,因為正正係有呢個(體質)考慮」。

上 / 下一篇新聞