港聞

港聞二

【Emily】新民黨民建聯「聯婚」 葉劉請食飯盒報喜

【明報專訊】新民黨主席葉劉淑儀噚日同黨友容海恩喺立法會請記者食飯盒,公布政圈喜訊:新民黨同民建聯「聯婚」。新民黨社區主任廖添誠(Marcus)同民建聯葵青區議員郭芙蓉(Jody)今個月底會拉埋天窗,而啲飯盒係由Marcus開嘅Cafe供應。葉太全日喜滋滋咁樣,話會做婚禮見證人。Marcus就同Emily講,同Jody一齊咗「一段時間」,「喺疫情之下覺得有個人好重要,唔想等喇」,仲大呼自己好錫Jody。

葉太噚日話諗住趁立春請一眾記者食飯盒,仲叫大家品評Marcus餐廳嘅食品。疫下婚禮都有人數上限,葉太透露Marcus同Jody會喺火鍋店「流水式」宴客到下晝6點。被問到係咪二人嘅媒人,葉太透露兩人係上清華大學公共行政碩士課程而認識,每個周末都去深圳上堂,「透過學習過程而互相了解,證明『書中自有顏如玉』」,仲笑言「新民黨係高攀大黨」。不如拉埋Jody入新民黨?葉太就話咁就唔好,「撬人唔好,做新抱得㗎喇」。

Marcus大讚未來老婆勤力,「最緊要係愛我同錫我」,又話兩個人第一次約會就喺火鍋店,所以揀火鍋店舉行婚禮別具意義。

相關字詞﹕民建聯 新民黨 郭芙蓉 廖添誠 葉劉淑儀

上 / 下一篇新聞